الخصوصية

شو بنجمع على الموقع

صفحات الموقع ما فيها أدوات تتبّع ولا إعلانات ولا عدّاد من شركة ثانية.

لو فتحت الموقع من رابط فيه مصدر (زي رابط من واتساب أو إنستغرام)، أو من موقع ثاني، وفتحت حساب أو بعتلنا رسالة، بنحفظ اسم المصدر مع حسابك أو مع رسالتك بس، عشان نعرف من وين بيوصلنا الناس.

لو بعتلنا رسالة من «تواصل معنا»: بنحفظ اسمك وجوالك، واسم المحل لو كتبته، ورسالتك، عشان نرد عليك. ما بنحفظ معها عنوان الشبكة (IP) ولا نوع جهازك.

شو بنجمع بالحساب

لما تفتح الحساب: اسمك، واسم المحل ونوعه، وجوالك، وكلمة السر. كلمة السر محفوظة مشفّرة بطريقة ما بتنقرأ، ولا حدا منا بيعرفها. والرقم السري (PIN) لكل موظف محفوظ مشفّر، وصاحب المحل بس بيقدر يشوفه من صفحة الموظف، وكل مرة بيشوفه بتنكتب بالسجل.

وبعدها كل الي بتدخّله إنت وموظفينك: المنيو والأسعار، الطلبات والدفعات وصور إثبات التحويل، الزباين والديون، الموردين والمخزون، الموظفين وصلاحياتهم.

وعشان نحمي حسابك بنسجّل كل دخول: الوقت، واسم الجهاز والمتصفح، وعنوان الشبكة (IP)، وإذا زبط أو لا. وكل تعديل مهم بينكتب بسجل التعديلات باسم الي عمله.

بيانات زباين المحل

الزباين الي بتسجّلهم إنت (أسماءهم وجوالاتهم وديونهم) بياناتهم بتخص محلّك. إحنا بنحفظها عنك، وما بنستعملها ولا بنتواصل معهم.

الزبون الي بيطلب من منيو الـ QR بدون حساب، بنحفظ طلبه بس. ولو فتح حساب من المنيو: بنحفظ اسمه وجواله ورقم سري مشفّر وطلباته، وما بيصير زبون بدفتر محلّك إلا لما الكاشير يأكّد حسابه.

ولما تبعت لزبون رصيده أو تذكير على واتساب، الرسالة بتطلع من جوالك إنت، مش منّا.

الـ cookies

صفحات الموقع ما بتحط cookies، إلا صفحة فتح الحساب و«تواصل معنا»: بتحط cookies للجلسة بس، عشان تحمي الفورم.

بعد ما تدخل حسابك بنحط اثنتين: وحدة للجلسة عشان تضل داخل، ووحدة للجهاز عشان نعرف إنه جهاز انوافق عليه. ما في cookies إعلانات ولا تتبّع.

وين محفوظة البيانات

بياناتك محفوظة على سيرفر مستأجر عند شركة استضافة، والدخول عليه لفريق حُسبان بس.

مين بيشوفها

إنت، والموظفين الي بتعطيهم دخول، كل واحد حسب صلاحياته.

فريق حُسبان بيشوف بلوحته المجاميع بس (زي عدد الإيصالات والمبيعات)، مش أسماء زباينك ولا أسعارك. ولما تطلب مساعدة، أو لما يلزم نحل مشكلة، ممكن واحد من فريقنا يفتح حسابك بـ«وضع الدعم»: لمدة قصيرة، للقراءة إلا لو لزم تعديل، وكل دخول وكل تعديل بينكتب عندنا باسم الي عمله. ونفس الشي لو طلّعنا ملف بياناتك من لوحتنا.

ما بنبيع ولا بنشارك

ما بنبيع بياناتك ولا بيانات زباينك لحدا، وما بنعطيها لحدا للإعلانات. بتمرّ بس على الجهات الي بتشغّل حُسبان، زي شركة الاستضافة، وبقدر ما بيلزم عشان يشتغل.

قديش بنحتفظ فيها

بياناتك بتضل محفوظة طول ما حسابك موجود، حتى لو صار «قراءة فقط» أو موقوف، عشان تقدر ترجع أو تنزّلها.

رسائل «تواصل معنا» بنمسحها لحالها بعد سنة من ما نرد عليها. وملف التنزيل الي بتطلبه بيضل 24 ساعة بس، وبعدها بينمسح.

التنزيل والحذف بطلبك

بتنزّل كل بياناتك بملف Excel من لوحة الإدارة بأي وقت.

بدك نحذف حسابك وكل بياناته؟ اطلبها منّا على واتساب من جوال صاحب الحساب. بنتأكد إنه إنت، وبنذكّرك تنزّل نسخة قبل، وبعدها بنحذفها إحنا بإيدنا. الحذف ما بيرجع.

التواصل

أي سؤال عن بياناتك، احكي معنا على واتساب. رقم الدعم بأسفل كل صفحة من الموقع.