شروط الاستخدام

مين إحنا

حُسبان نظام كاشير ومنيو QR ودفتر حسابات للكفيهات والمطاعم، بيشتغل من المتصفح على الجوال أو أي جهاز. الجهة المسؤولة عنه: حُسبان، من غزة، فلسطين.

الحساب ومين مسؤول عنه

الحساب لصاحب المحل الي فتحه. بتدخل لوحة الإدارة بجوالك وكلمة السر، وموظفينك بيدخلوا برقم سري (PIN) على أجهزة بتوافق عليها إنت أو مديرك.

إنت مسؤول عن مين بتعطيه دخول وشو بيقدر يعمل، وعن كلمة السر والأرقام السرية: لا تعطيهم لحدا مش لازم. لو شكّيت إنه حدا دخل على حسابك، شيل الجهاز من «الأجهزة» واحكي معنا فوراً.

الي بينكتب بحُسبان (الطلبات والدفعات والديون والأسعار) بتكتبه إنت وموظفينك، وإنتو مسؤولين عن صحته.

التجربة والاشتراك والدفع

أول 14 يوم تجربة كاملة ببلاش، وبدون بطاقة. بعدها بتختار باقتك من «الاشتراك» بلوحة الإدارة، وبتحوّل الاشتراك على محفظة أو حساب حُسبان، وبترفع صورة الإيصال. بنراجع الإيصال، ولما نختمه «وصل» بتبدأ مدتك: شهر، أو 3 أو 6 أشهر، أو سنة.

السعر شهري وثابت، ومكتوب بصفحة الأسعار. ما في نسبة من مبيعاتك، ولا رسوم تأسيس. ولو دفعت قبل ما تخلص تجربتك أو مدتك، المدة الجديدة بتبدأ من آخر الي عندك، فما بيروح عليك ولا يوم.

لو تأخرت بالدفع

لما تخلص مدتك وما يوصلنا إيصال جديد، عندك 7 أيام تنبيه والشغل ماشي زي ما هو. بعدها الحساب بيصير «قراءة فقط»: بتشوف كل شي وبتنزّل بياناتك، بس ما بتقدر تضيف جديد. أول ما نختم إيصالك بيرجع الحساب زي ما كان، وكل بياناتك فيه.

تغيير الباقة والسعر

بتقدر ترقّي لباقة أكبر بأي وقت، والترقية بتمشي أول ما نختم إيصالها. النزول لباقة أصغر بيبدأ مع أول مدة جديدة بعد الي دفعتها.

لو زاد عندك موظفين أو أجهزة عن حدود باقتك، ما بنشيل ولا بنوقّف حدا، بس ما بتقدر تضيف جديد لحد ما ترقّي.

لو غيّرنا سعر باقة، السعر الجديد بيمشي من أول تجديد بعد التغيير، مش على مدة دفعتها.

الاسترجاع

المدة الي دفعتها ما بترجع فلوسها، وبتضل إلك لآخرها حتى لو وقّفت تستعمل حُسبان قبل ما تخلص. إلا لو صار معك ظرف خاص: احكي معنا على واتساب وبنشوف وضعك.

بياناتك إلك

كل الي بتدخّله بحُسبان (المنيو والطلبات والدفعات، الزباين والديون، الموردين والمخزون) بياناتك إنت. بتنزّلها كاملة بملف Excel من لوحة الإدارة بأي وقت، حتى لو حسابك «قراءة فقط» أو موقوف. ما بنحذف شي من بياناتك بدون طلبك، وما بنستعملها إلا عشان نشغّل حُسبان إلك. والتفاصيل بصفحة الخصوصية.

شو ممنوع

ممنوع تستعمل حُسبان بطريقة بتضر غيرك أو بتضر النظام: تحاول تدخل على حساب مش إلك، أو تخرّب الخدمة أو توقّفها، أو تستعملها لشغل مخالف للقانون، أو تبيع الدخول عليها لغيرك.

التوقيف وليش

ممكن نوقّف حساب انستعمل بطريقة ممنوعة بهالشروط، أو فيه دفع متأخر ما انحلّ. وقبل ما نوقّف أي حساب بنحكي مع صاحبه. الحساب الموقوف ما بيشتغل للبيع، بس صاحبه بيضل يدخل لوحة الإدارة وبينزّل بياناته.

حدود مسؤوليتنا

حُسبان بيسجّل حساب محلّك، بس فلوسك ما بتمرّ علينا: الزبون بيدفعلك إنت، كاش أو تحويل، وإنت بتسجّل الدفعة. إحنا مش مسؤولين عن تحويل ما وصل، ولا عن فرق بالصندوق، ولا عن قرار أخذته على أرقامك.

بنشتغل عشان يضل حُسبان شغّال وبياناتك محفوظة، بس ممكن يصير انقطاع أو عطل، وما بنقدر نوعد إنه ما يصير أبداً. لما يقطع النت، الي بتسجّله على الجوال بيضل محفوظ وبيتبعت لما يرجع.

تعديل الشروط

لو عدّلنا هالشروط بنغيّر تاريخ «آخر تعديل» فوق، والنص الجديد بيكون هون. ولو التعديل بيغيّر إشي مهم عليك، بنبعتلك رسالة على واتساب قبل ما يمشي.

التواصل

أي سؤال عن هالشروط أو عن حسابك، احكي معنا على واتساب. رقم الدعم بأسفل كل صفحة من الموقع.